Flogferðslan í Týsklandi løgd lamin

Øll flogferðslan hjá Lufthansa í Týsklandi er avlýst í morgin. Starvsfólk og leiðsla í felagnum eru ósamd um eftirlønarviðurskiftini

Hundraðtals flogferðir hjá Lufthansa eru avlýstar í Týsklandi síðani fríggjadagin. Í morgin leggja starvsfólkini niður alt arbeiðið til á midnátt fríggjadagin, tí tey eru ónøgd við eftirlønarviðurskiftini

Mynd: AP

Bjarni Mohr

10.11.2015 - 14:29

Týska flogfelagið, Lufthansa, hevur síðani fríggjadagin avlýst hundraðtals flogferðir. Starvsfólk hjá felagnum hava lagt arbeiðið niður, tí tey eru ikki nøgd við arbeiðsviðurskiftini.

Starvsfólkini hjá Lufthansa halda, felagið eigur at bøta um møguleikarnar hjá starvsfólkunum at fara frá fyri aldur tíðliga, men tí er leiðslan ikki samd í.

Umboð fyri starvsfólkini og leiðsluna hjá Lufthansa hava síðani fríggjadagin roynt at semjast, men higartil uttan eydnu. Tí verður arbeiðssteðgurin nú víðkaður.

Leggja nú alt arbeiðið niður

Alt arbeiðið verður lagt niður frá mikumorgninum til á midnátt fríggjadagin, siga umboð fyri starvsfólkini hjá Lufthansa, sambært tíðindastovuni, Asociated Press.

Arbeiðssteðgurin hevur longu rakt túsundtals ferðafólk, ið hava flogið við Lufthansa síðani fríggjadagin. Nú fara enn fleiri ferðafólk at merkja arbeiðssteðgin.

Fakfelagið vil tryggja teimum 19.000 starvsfólkunum betri eftirlønarviðurskifti, fara tey frá fyri aldur tíðliga. Flogfelagið vil tó ikki ganga við til krøvini hjá fakfelagnum.