Brúgvin um Streymin er opin aftur fyri ferðslu

Brúgvin um Streymin er stongd í løtuni. Eitt ferðsluóhapp hendi seinnapartin beint norðanfyri brúnna, Eysturoyarmegin, upplýsir vakthavandi á politistøðini í Havn.

Alarmsentralurin fekk klokkan 13:52 fráboðan um, at ein bilur hevði koyrt út frá innkoyringini til Norðskála og út fyri ein trailara, sum koyrdi oman móti brúnni eftir landsvegnum.

Ferðslan stendur í stað

Ferðslan um brúnna um Streymin stendur í løtuni í stað. Brúgvin letur ikki uppaftur fyrr enn kanningarnar eru gjørdar, segði Andrass Marr Poulsen, varapolitiinspektørur við útvarpið.

Sløkkiliðið í Havn er á staðnum og klippir bilar sundur. Klokkan 14:51 komu tveir sjúkrabilar til Havnar. Frammanfyri báðar sjúkrabilarnar koyrdi hvør sín politibilur.

Trý fólk eru flutt á Landssjúkrahúsið, segði Andrass Marr Poulsen, varapolitiinspektørur, í beinleiðis samrøðu við útvarpið klokkan trý.

Vilja ikki siga, hvussu álvarsamt tað er

Andrass Marr Poulsen vil ikki siga, hvussu álvarsamt óhapp ella vanlukku, talan er um við Streymin, sambært útvarpstíðindunum.

Klokkan 15:10 kom tann triði sjúkrabilurin til Havnar. Tann sjúkrabilurin var eisini fylgdur av einum politibili, ið koyrdi frammanfyri.

Seinast dagførd klokkan 16:32

Brúgvin um Streymin er nú opin aftur fyri ferðslu.