Gott ár hjá donsku fiskivinnuni

Hækkandi prísurin fyri brisling hevði við sær, at danska fiskivinnan hevði ein umsetning sum var 3,4 milliardir kr., eina hálva milliard meir enn í 2014.

Tá talan er um matfisk, so var minni av fiski landaður, men príshækking hevði við sær, at úrslitið var betri enn árið fyri.

Munandi betri úrslit enn í 2014

Tá talan er um ídnaðarfisk, fiskaðu skipini ein triðing meir, og tá prísurin samstundis hækkaði, var úrslitið munandi betri enn í 2014.

Í fjør fiskaðu donsku skipini sløk 320.000 tons av brislingi, og tey vórðu seld fyri 570 milliónir kr. Tað vóru 270 milliónir meir enn í 2014.

- Ídnaðarfiskiskapurin hevur sera stóran týdning fyri danska samfelagið, og ikki minst fyri útjaðaran. Tí er neyðugt, at donsku polittikararnir støðugt virka fyri at fáa størri kvotur til vega, sigur formaðurin í danska Fiskimannafelagnum, Svend-Erik Andersen.