Rættarmál um barnaporno útsett

Rættarmálið móti einum 63 ára gomlum manni, sum er ákærdur fyri at hava barnaporno á telduni og harðdiskum, og fyri at breiða út barnaporno til onnur, er útsett til annan mars.

Orsøkin er forfall í Føroya rætti. At tað verður útsett í ein mánað kemst av, at pláss er ikki á rættarlistanum fyri hesum máli fyrr enn í mars, verður sagt á Dómaraskrivstovuni.

SÍ EISINI Ákærdur fyri at eiga grovt barnaporno

Sambært ákæruritinum hevur maðurin havt 6.485 barnapornografiskar myndir og 14.554 barnapornografisk filmsbrot í varðveitslu.

Maðurin er eisini ákærdur fyri at hava latið fleiri hundrað myndir og nakrar túsund filmar víðari til onnur. Hann hevur ikki framleitt tilfar sjálvur.

Ákærin, Linda Hesselberg, sigur, at hon fer at krevja fongulsrevsing, men enn er ikki uppgjørt, hvussu stranga revsing ákæruvaldið fer at krevja.