Dømdur fyri kynsligan ágang móti smágentu

Maðurin er dømdur fyri aðra kynsliga samveru enn samlegu. Revsingin er tvey ára fongsulsrevsing, harav 18 mánaðir eru treytaðir, skrivar in.fo

38 ára gamli maðurin skal vera undir eftirliti av kriminalforsorgini og skal í sálarliga viðgerð.

Dømdi maðurin skal eisini rinda gentuni 50.000 krónur í endurgjaldi fyri tort, umframt at hann skal rinda sakarmálskostnaðin

Byrjaði tá gentan var seks ár

Harumframt skal hann rinda gentuni 50.000 krónur í endurgjaldi. Kynsligi ágangurin er framdur í tíðarskeiðnum frá 1994 til 2001.

Gentan var einans 6 ára gomul, tá ágangurin byrjaði. Talan er um ágang framdan á tveimum ymiskum bústøðum, umframt í bilinum hjá ákærda.

Sambært in.fo greiddi dómarin í Føroya Rætti frá, at støddin á endurgjaldinum í slíkum brotsverkum varð herd í 2008, meðan sjálv revsingin varð herd í 2009.

Partur av revsingini treytað

Meginreglan í lógini er, at ein verður revsaður sambært tí lóg, sum varð í gildi, tá brotsverkið varð framt.

Tí segði dómarin seg ikki kunna taka atlit til herdu revsingina, tá hesin dómurin varð sagdur. Sambært in.fo vísti dómarin eisini á, at talan um hendingar, sum fóru fram fyri 15 til 22 árum síðani.

Ákærdi sjálvur var ikki meiri enn hálvvaksin, tá ágangurin byrjaði, men hevur í dag góð persónlig viðurskifti. Tí metti dómarin, at tað var ráðiligt og rætt at gera part av revsingini treytaða.