Vatnið rennur undan í New Delhi

- Vit hava einki vatn eftir. Tað síðsta fór í morgun, sigur ein ráðharri hjá indisku stjórnini sambært indiska blaðnum, Hindustan Times.

Myndugleikarnir í New Delhi hava gjørt av at steingja skúlar og arbeiðspláss, nú vatnneyð er í høvuðsstaðnum. Enn er óvist hvussu leingi.

Vatnið verður nú eisini skamtað. Tað hevur elvt til øsing, at nøkur starvsfólk hjá stjórnini og sjúkrahús sleppa undan vatnskamting.

Fáa bara ein fjórðing av vanligu nøgdini

Vanliga fáa teir umleið 25 milliónir íbúgvarnir í New Delhi 3,7 milliardir  litrar av vatni hvønn dag. Tað talið er nú minkað niður í næstan ein fjórðing.

Myndugleikarnir klára bara at geva fólkinum í New Delhi umleið eina milliard litrar av vatni um samdøgrið.

Ófriður er eisini brostin á í indiska høvuðsstaðnum, nú vatnneyð er. Minst 10 fólk eru deyð, og 150 hava fingið skaða í ófriðinum.