Metnógv ferðamannaskip í Íslandi

Færri ferðamannaskip koma til Føroya í ár enn undanfarin ár, men í Íslandi setur talið av ferðamannaskipum met. 

213 ferðamannaskip við til samans 200.000 fólkum umborð hava higartil boðað frá, at tey fara at leggja at í Íslandi.

Í Føroyum verða ferðamannaskipini umleið 40 í tali í ár. Tað er góð 24 prosent minni enn í fjør.

Enn fleiri næsta ár

Ferðavinnan í Íslandi fegnast um góðu gongdina.

"Vit vænta áhaldandi vøkstur næstu árini," sigur Erna Kristjánsdóttir við Morgunblaðið.

Hon vísir á, at higartil hava fleiri enn 100 skip longu boðað frá vitjanum næsta ár, í 2017.