Tannáringur tikin fyri yvirgangsætlanir

18 ára gamli maðurin í Avstralia varð handtikin í Sydney í dag, eftir at løgreglan í aðrari atsókn framdi húsrannsóknir í bústøðum í Melbourne.

Løgreglan hevur skuldsett tannáringin fyri at hava leitað eftir og kannað støð í Sydney, har hann kundi fremja yvirgangsatsókn, og hann skal, sambært skuldsetingini, eisini hava roynt at skaffa sær skotvápn.

Fingu illgruna til mannin í februar

18 ára gamli maðurin varð hildin aftur á flogvøllinum í Sydney í februar mánaði, tá hann royndi at fara úr Avstralia til Sýria fyri at stríðast saman við jihadist-bólkum. Tá var longu hald lagt á passið hjá honum.

- Síðani tá hava viðkomandi myndugleikar hildið vakið eygað við honum. Tíðliga í morgun varð avgerð tikin um at handtaka hann fyri at forða fyri eini yvirgangsatsókn um stutta tíð, stendur í fráboðan frá avstralska ákærumyndugleikanum í dag.

Tannáringurin, sum býr í Sydney, kann verða ákærdur fyri at hava fyrireikað ella at hava ætlanir um at fremja yvirgangsatsóknir. Hann kann verða dømdur lívlanga fongsulsrevsing.