Saknað kvinna funnin deyð

Um átta tíðina í morgun fann tyrlan kvinnuna einar 150 metrar í brekkuni oman av Støðlafjalli, Úti í Teigum. Lækni staðfesti seinni, at kvinnan var deyð.

- Kvinnan er nokk gliðin oman brekkuna, tað er nokk so bratt har, og hon hevur onkrar smávegis løstir, segði John Kruse, vaktsjefur á politistøðini í Havn, við útvarpið.

Stórt leitingararbeiði

Kvinnan fór niðan á Støðlafjall seinnapartin mánadagin, men tá kvinnan ikki var komin aftur um níggju tíðina mánakvøldið, varð ringt til politiið.

Síðani fóru staðkend bjargingarfólk, fjallabjargarar, sjálvboðin, tyrla og hundur at leita. Kvinnan var kend á Støðlafjalli, tí hon hevur ofta gingið har.

Avvarðandi hjá kvinnuni eru kunnað, upplýsir løgreglan.