Nú hækkar barnafrádrátturin

Á nýggjárinum hækkar barnafrádrátturin í landsskattinum fyri børn upp til sjey ára aldur. Hann hækkar úr 6.500 upp í 9.200 krónur um árið.

Fyri børn millum sjey og 17 ár verður barnafrádrátturin í landsskattinum tann sami. Tað vil siga 6.500 krónur um árið.

Løgtingið samtykti einmælt uppskotið frá landsstýrinum um at hækka frádráttin fyri smábørn. Umframt barnafrádráttin í landsskattinum fáa foreldur eisini barnafrádrátt í kommunuskattinum.