Kunngjørt vinnaran ov tíðliga

Hóast virðislønirnar hjá Norðurlandaráðnum ikki verða latnar fyrr enn í kvøld, hevur norska Dagsavisen longu nú kunngjørt, hvør fær ta einu virðislønina

Og vilt tú vita, hvussu tað fer at gangast Carl Jóhan Jensen, sum er í uppskoti at fáa bókmentaheiðurslønina, í kvøld, skalt tú ikki lesa víðari her.

Mynd: Dagsavisen avdúkar í dag á forsíðuni, hvør fær bókmentaheiðurslønina hjá Norðurlandaráðnum í kvøld

Sambært pappírsútgávuni av Dagsavisen í dag, fær Katarina Frostenson úr Svøríki heiðurslønina fyri yrkingarsavnið Sånger och formler.

Blaðið skrivar, at Katarina Frostensen fekk heiðurslønina á einum hátíðarhaldi, sum longu hevur verið. 

SÍ EISINI Trý úr Føroyum í uppskoti

Men norðurlendsku heiðurslønirnar verða ikki handaðar fyrr enn í kvøld, og av røttum eigur tað at verða hildið loyniligt, hvør fær heiðursløn, til hátíðarhaldið hevur verið.

Kunningarráðgevin hjá Norðurlandaráðnum, Louise Hagemann, sigur, at hon skilur einki, tí einki verður kunngjørt fyrr enn í kvøld. 

Mentanarredaktørurin á Dagsavisen sigur, at nú verður kannað, hví blaðið longu hevur kunngjørt, hvør fær bókmentaheiðurslønina. 

Dagsavisen umber

Katarina Frostenson, sum sambært Dagsavisen fær norðurlendsku bókmentaheiðurslønina í ár, er lýriskt skald og limur í Svenska akademinum, sum býtir út Nobel-heiðurslønina í bókmentum.

Í 2012 var hon eisini í uppskoti at fáa bókmentaheiðurslønina hjá Norðurlandaráðnum. 

Dagsavisen umber nú á heimasíðu síni, at blaðið hevur hevur prentað, hvør fær bókmentaheiðurslønina í ár. Tað átti ikki at verið gjørt, skrivar blaðið á dagsavisen.no.