Fidel Castro deyður

- Kæru kubanar, tað er við sorg í hjarta, at eg skal boða okkara fólki, okkara vinum í Amerika og kring allan heim, at í dag, 25.november klokkan 22:29, er oddamaðurin í kubansku kollveltingini, Fidel Castro Ruz, deyður.

Soleiðis ljóðaði tað í almenna kubanska sjónvarpinum í gjárkvøldi, tá bróðir Fidel Castro - Raul Castro - sum nú er forseti á Cuba, bar tjóðini deyðsboðini.

Forseti í 46 ár

Seinast í fimmtiárunum stóð Fidel Castro á odda fyri tí kollvelting, sum broytti Cuba til eitt kommunistiskt samfelag. Eftir guerillakríggj í fleiri ár eydnaðist tað Fidel Castro og hansara fólki at taka valdið á Kuba, 1. januar í 1959.

Fidel Castro sat sum forseti í samfull 46 ár, líka til 2008, tá heilsan fór somikið at bila, at hann kendi seg noyddan at lata valdið víðari til yngra bróðurin, Raul.

Síðstu árini var Fidel Castro lítið at síggja alment, men á landsfundinum hjá kubanska kommunistaflokkinum í vár helt hann røðu, har hann enn einaferð vardi kommunistisku hugsjónina.