Handtikni bilførarin latin leysur

12 fólk lótu lív og 24 fingu løstir og liggja enn á sjúkrahúsi, - 14 av teimum særdu eru í lívsvanda. Men í løtuni er eingin ávísur undir illgruna fyri atsóknna.

Hoyr Bjørt Katrinardóttir Kragesteen, sum býr í Berlin, greiða frá

Einasti, sum hevur verið undir illgruna er ein 23 ára gamal pakistanskur maður, sum hevur søkt um friðskjól í Týsklandi, men hann varð latin leysur seint í gjár, tí prógvini móti honum vóru ikki nóg góð. Tað hevur elvt til stúran, nú fólk royna at fóta sær aftur eftir atsóknina - at ein drápsmaður gongur leysur í landinum. Týski innanríkisráðharrin, Thomas De Maiziére, sigur í viðmerking til leyslatingina, við ZDF, at tað kann ikki útlokast, at gerningsmaðurin framvegis gongur leysur.

Les eisini: 12 fólk doyðu og 48 løsta í yvirgangi í Berlin

Tað er ikki greitt, hví atsóknin varð framd, sigur Maiziére, men tað er eingin ivi um, at hetta var eitt álop, og kanningarfólkini arbeiða við fleiri slóðum. Yvirgangsfelagsskapurin IS, sigur á eini av propagandasíðum sínum, at ein IS-hermaður fekk íblástur at fremja atsóknina og sostatt akta boðunum frá felagsskapinum, sum heitir á muslimar um at fremja atsóknir í Vesturheiminum. Eingi tekin eru tó um, at IS hevur skipað fyri atsóknini, skrivar svt.se.