2000 finnar fáa borgaraløn

Finska stjórnin fer nú undir eina roynd, sum hevur vakt ans í øllum heiminum. Næstu tvey árini fáa 2.000 arbeiðsleys, í aldrinum 18 til 58 ár, útgoldnar 4.000 kr. frá tí almenna.

Peningurin er skattafríur, og tey, sum fáa hann, skulu ikki lúka somu krøv, sum arbeiðsleys og tey, ið fáa kontanthjálp, annars skulu lúka í Finnlandi. Hetta er ein roynd, sum skal avdúka, hvørja ávirkan ein almenn veiting, eitt slag av borgaraløn, sum verður latin treytaleyst, hevur.

Granskarar skulu fylgja teimum 2.000 fólkunum, sum fáa borgaraløn, og ein eftirlitsbólkur skal fylgja teimum, sum fáa dagpening og kontanthjálp eftir gomlu skipanini, hetta til endan av 2018.

Royndin skal m.a. vísa, um tey, sum fáa borgaraløn, gerast dovin, ella um leysu teymarnir hava við sær, at tey fáa hug at fáa eitt parttíðarstarv, fara undir útbúgving, ella stovna egið virki.