Granskari: Dieselbannið væleydnað

- Tað eru dieselbilarnir, sum dálka mest. Tí hevur bannið verið munadyggari enn um tað vórðu allir bilar, sum vórðu bannaðir.

Tað sigur Leonor Tarrasón, granskingarleiðari á Norsk institutt for luftforskning, sum helvur eitt vakið eyga við dálking í Noregi.

Myndugleikarnir í Oslo hava avgjørt, at dieselbilar ikki skuldu sleppa at koyra í Osla í dag. Nú fara myndugleikarnir at greina mátingarnar.

Óvist hvat munaði mest

Stóra ivamálið hevur verið, um tað er dieselbannið ella um tað eru veðurviðurskiftini í dag, sum hava ávirkað dálkingartølini rætta vegin.

- Vit fara at granska í, hvat munar mest fyri dálkingina - veðurviðurskiftini ella dieselbannið, sigur granskingarleiðarin á NILU sambært NRK.

Frá midnátt til fyrrapartin minkaði ferðslan í Oslo við 10 prosentum. Fólk, sum ikki hava aktað boðunum í dag, hava fingið 1.500 krónur í bót.