Evropa miðdepil fyri barnaporno

Nýggja ársfrágreiðingin hjá Internet Watch Foundation vísir, at nú verða 60 prosent av heimsins tilfari, sum vísa kynsliga barnamisnýtslu, goymd á ambætarum í Evropa. Vøksturin er heili 19 prosent.

BBC skrivar, at tað mesta av ólógliga tilfarinum verður goymt í Niðurlondum. Higartil hevur Norðuramerika annars verið fremsta ambætarapláss fyri barnaporno, men herdar fráboðanarreglur og eftirlit hava broytt støðuna.

- Evropa er nú fremsti ambætarin av barnaporno og ikki Norðuramerika, sigur Susie Hargreaves, stjóri í IWF, sum er bretski stovnurin, sum hevur til endamáls at finna og burturbeina barnaporno á bretskum netum.

Tøl hjá IWF vísa, at í 2015 var støðan tann øvuta - tá vóru næstan 60 prosent av heimasíðum við misnýtslutilfari í Norðuramerika. Men í fjør var hetta talið minkað niður á 37 prosent, meðan talið í Evropa vaks upp í 60 prosent.