Norðurkorea ávarar Australia um kjarnorkuálop

Tað sigur norðurkoreiska tíðindastovan KCNA, sum endurgevur ein talsmann í uttanríkisráðnum. Ávaringin kemur í kjalarvørrinum á einari orðing hjá avstralska uttanríkisráðharranum, Julie Bishop, har hon sigur, at Avstralia fer at seta enn fleiri revsitiltøk í verk móti Norðurkorea. hetta hevur eftir øllum at døma fingið øði í í Norðurkorea. Heldur Avstralia fram at fylgja átøkunum hjá USA at avbyrgja og kúga Norðurkorea og heldur fram at vera ein brigata fyri amerikanska valdsharran, fer hetta at vera ein sjálvmorðsátak innan fyri karmarnar á einum kjarnorkuálopi frá strategisku megini hjá Norðurkorea, sigur talsmaðurin sambært KCNA. Talsmaðurin mælir eisini Juliu Bishop til at umhugsa avleiðingarnar av sínum eirindaleysu orðingum eina ferð aftrat.

Avstralski uttanríkisráðharrin segði fyrr í vikuni, at kjarnorkuætlanin hjá Norðurkorea er ein álvarsom hóttan móti Avstralia. Hon heldur, at revsitiltøk eru besta amboðið at køva ætlaninar hjá Norðurkorea at gerast eitt kjarnorkuveldi. Hon heitti eins og amerikanski forsetin, Donald Trump, á Kina um at leggja trýst á Norðurkorea fyri at fáa landið at steðga kjarnorkuætlanunum.