Bretar vilja hava valdið í egnum sjógvi

Í Bretlandi vil umhvørvismálaráðharrin seta ferð á arbeiðið at seta millumtjóðasáttmálan úr gildi, sum loyvir útlendingum at fiska í bretskum sjóøki.

Tað vil siga, at írar, hollendarar, fraklendingar, týskarar og belgiarar skulu ikki troyta bretsku grunnarnar meira.

Tað skrivar BBC fyrrapartin.

- Nú taka vit ræðið aftur á okkara egna sjógvi, sigur Michael Gove, sum er umhvørvismálaráðharri.

Millumtjóðasáttmálin varð undirskrivaður í 1964, áðrenn Bretland fór upp í ES.

Avgerðin ber við sær, at bretar sleppa heldur ikki at fiska í ES-sjógvi.

Í Bretlandi verður fiskivinnupolitikkurin hjá ES mettur at hava verið ein vanlukka fyri fiskimenninar, og tað vil stjórnin broyta.

Men hetta er eisini ein avgerð, sum fer at verja umhvørvi, heldur ráðharrin.

- Fiskivinnupolitikkurin hjá ES hevur verið ein vanlukka fyri okkara umhvørvi, og vit vilja nú stimbra undir eina burðardygga fiskivinnu, sigur Michael Gove.

Greenpeace ávarar bretar, at bretska fiskivinnan fær ikki betri livikor av einans at taka ræðið á heimasjónum.

Í Danmark stendur fiskivinnan til at missa 40 prosent av inntøkunum, nú bretar fáa sítt egna fiskimark.