Noreg útflytir nógvan fisk

Fyrstu 9 mánaðirnar í ár útflutti Noreg fiskavørur fyri 69 milliardir kr. Talan var um 1,8 milliónir tons av fiskavørum.

Sølan vaks við trimum prosentstigum og virðið vaks við 6 prosentstigum. Sølan í september var 189.000 tons, sum vórðu seld fyri 8 milliardir kr.

Talan var um 18 prosentstig minni í nøgd og 8 prosentstig minni í virði enn í september í fjør.

Sølan av laksi var tann sama sum í fjør, men minni varð selt av sild og makreli.

Noreg hevur higartil í ár selt 711.000 tons av laksi fyri 48 milliardir kr. Tað er sama nøgd sum í fjør, men virðið er økt við 10 prosentstigum, ella 4,2 milliardum kr.

Í september var sølan av laksi 97.300 tons fyri 5,8 milliardir kr. Prísurin á alda laksinum var 55,47 norskar kr fyri kg í september, 1,12 kr hægri fyri kg enn somu tíð í fjør.

Poland og Frakland keyptu størsta partin av laksinum í Noreg í september.