Atkvøða um nevnd í dag, velja hana um tvær vikur

Løgtingið skal í dag atkvøða um uppskotið hjá Helenu Dam á Neystabø í Javnaðarflokkinum og Annitu á Fríðriksmørk í Tjóðveldi um at seta eina grein 25 nevnd at viðgera uppskotið hjá løgmanni um stjórnarskipan.

Nevndin verður vald á tingfundi 8.november.

12 fólk skulu veljast í nevndina, tvey úr hvørjum av teimum fýra stóru flokkunum og ein úr teimum smáu. Harafturat verður uttanflokkatingkvinnan, Sonja Jógvansdóttir, í nevndini.

Nevndin, sum nú skal veljast at viðgera stjórnarskipanina, eitur eftir grein 25 í tingskipanini, sum sigur, at løgtingið kann seta nevndir at geva løgtinginum tilmæli í ávísum málum.   

Løgtingið fer annars at hava aðalorðaskifti um rúsdrekka og rúsevni í dag.

Tingfundurin byrjar klokkan tíggju.