Seinasta kæran avgreidd og slætt borð fyri jól

Landsstýrismálanevndin fer nú at skriva niðurstøðu um seinastu kæruna, nevndin hevur, og ætlanin er at hava slætt borð fyri jól, sigur nevndarformaðurin, Magnus Rasmussen.

Jørgen Niclasen, tingmaður, kærdi 28.februar Høgna Hoydal, landsstýrismann, fyri fyrst at skriva út fiskirættindi og síðani taka hesi rættindi aftur.

Nevndin hevði fund fyrrapartin. Høgni Hoydal var á fundinum.

Nevndin fer nú at skriva niðurstøðu um málið. 

Jørgen Niclasen sigur, at nótaskipini fingu rætt at fiska sløk 23.000 tons av makreli í ES-sjógvi.

Rættindi

Tonsini vórðu býtt millum skipini.

Nótaskipini fingu øll fiskiloyvi, har tilskilað varð, hvussu nógv hvørt skip kundi fiska. 

Men við kunngerð 26.januar í ár tók landsstýrismaðurin ein part av hesum rættindum aftur.

Jørgen Niclasen vísir í kæruni á, at verður ein tílík tilsøgn tikin aftur, kann tann, sum missir hana, krevja endurgjald frá landskassanum. 

Høgni Hoydal vísir aftur, at hetta málið kann javnmetast við at taka fiskiloyvi aftur.