Nýggjur forseti í Suðurafrika

Í gjár boðaði Jacob Zuma, forseti, frá, at hann legði frá sær, og leiðandi hægstarættardómarin las umbønina frá Jacob Zuma um at verða loystur úr forsetaembætinum, áðrenn atkvøtt varð í tinginum.

Zuma hevur verið undir hørðum trýsti frá sínum egnu at leggja frá sær, tí hann er lagdur undir mutur.

- Eg havi tænt fólkinum í Suðurafrika eftir besta førimuni, segði 75 ára gamli Jacob Zuma, sum í fyrstu syftu sýtti fyri at leggja frá sær.

Ætlanin var at at reisa misálit á Zuma í dag, men tað varð av ongum, tí hann avgjørdi at leggja frá sær.

Jacob Zuma var formaður í ANC til desember í fjør, tá Cyril Ramaphosa tók við formanssessinum.

Í dag var Ramaphosa so valdur til forseta eftir Jacob Zuma.

AFP-tíðindastovan skrivar, at suðurafrikanska løgreglan hevur givið boð um at handtaka Ajay Gupta, sum er ein av trimum brøðrum í einum húski í Suðurafrika.

Gupta-húskið verður sett í samband við fleiri mál um mutur, sum fyrrverandi forsetin, Jacob Zuma, eisini er undir illgruna at hava verið uppií.