Stjórin í Interpol lagt frá sær

Meng Hongwei er farin frá sum stjóri í altjóða løgreglufelagsskapinum, Interpol.

Interpol sigur, at kinesiski stjórin hevur sagt seg úr starvi, og at hann leggur frá sær alt fyri eitt.

Suðurkoreanarin, Kim Jong Yang, er settur sum stjóri fyribils.

Meng Hongwei hvarv 25. september. 

Í gjár kunngjørdu kinesiskir myndugleikar, at tað verður kannað, um Hongwei hevur brotið lógina.

Eisini vararáðharri

Meng Hongwei er eisini vararáðharri fyri almennari trygd í Kina.

Hongwei er kinesari, og hann varð settur sum stjóri í Interpol fyri tveimum árum síðani. Interpol hevur høvuðssæti í Fraklandi, og Hongwei og húski hansara hava búð í Lyon síðani.

Ein franskur embætismaður hevur upplýst, at Meng Hongwei fór av høvuðsskrivstovuni hjá Interpol í Lyon síðst í september, og fór við flogfari til Kina.

Interpol skrivaði leygardagin á síni heimasíðu, at felagsskapurin hevur biðið Kina um eitt alment svar, hví Hongwei er horvin.