Vinnan óttast Brexit

Fimm av teimum størstu arbeiðsgevarafeløgunum í Bretlandi heita nú á bretska undirhúsið um at samtykkja avtaluna hjá Theresu May, forsætisráðharra, skrivar the Guardian.

Arbeiðsgevararnir eru forfardir um stríðið í undirhúsinum og ávara um, at fer Bretland úr ES uttan nakra avtalu, so fer illa fyrireikaði bretski búskapurin at klára seg sera illa.

Parlamentslimir eiga at gevast við at "spæla politikk", sum tey orða seg, og stuðla avtaluni hjá May, siga arbeiðsgevararnir - annars verður búskaparligur ruðuleiki.

Ráðharrar fyrireika nú av álvara møguleikan fyri, at eingin avtala verður.

Tilbúgvingin inniber millum annað, at milliardir verða settar av til útlendingamál, landbúnað og onnur øki, og við at seta 3.500 herfólk í bíðistøðu, at hjálpa til í neyðstøðum.

Ætlanin er eisini at seta 3.000 fólk í almenna tænastu, til dømis hjá skattamyndugleikanum, og fleiri hundrað trygdarfólk skulu setast afturat á flogvallum og øðrum altjóða farstøðum.

Men vinnuligir leiðarar siga, at landið er langt frá at vera til reiðar at slíta við ES uttan at nøkur avtala er millum partarnar frammanundan.

Nú er drála so leingi, at fyritøkur í øllum støddum fyrireika seg til eina framtíð uttan handilsavtalu við ES.

Hetta fer við nógvari tíð og pengum, men tað merkir eisini, at fyritøkurnar eru givnar at gera íløgur, og í ringastu førum flyta tær framleiðslu og onnur arbeiðspláss úr Bretlandi.