Kunnu flyta inn í summar eru boðini til býráðið

Í summar kunnu fimm kommunulæknar flyta í nýggj høli við Kirkjustræti í Hoyvík.

Tað hevur Tórshavnar kommuna fingið at vita frá tí, sum eigur nýbygningin við Kirkjustræti.

Eitt smápartafelag hjá Heðini Lamhauge eigur bygningin.

Fimm kommunulæknar skulu vera í bygninginum, tveir í neðra og tríggir í erva.

Tvey kommunalæknastørv eru normerað afturat í Havn og kommunulæknarnir á Frúutrøð og í Berjabrekku skulu flyta haðani.

Kommunan skal rinda 23 mió. kr. netto í leigu í 15 ár, - tað er ein millión og góðar 530.000 um árið. 

Netto, tí tá er leigan fyri hini hølini, sum kommunulæknar fara úr, drigin frá.

Kommunan rindar onga leigu, fyrr enn flutt verður í góðkendu læknahølini.

Leigan við Kirkjustræti er prístalsjavnað, og hon hækkar altíð í minsta lagi eitt prosent um árið.