Brexit-avtalan hjá May vrakað

Bretski forsætisráðharrin, Theresa May, tapti stórt, tá bretska undirhúsið í kvøld vrakaði hennara Brexit-avtalu við 432 atkvøðum ímóti og 202 fyri. 

Sambært heimasíðuni hjá Danmarks Radio, so er hetta størsti smeitur, ein bretsk stjórn hevur fingið í 100 ár.  

Avtalan við ES skuldi annars tryggja, at Bretland kundi fara úr ES undir skipaðum viðurskiftum, men tað hongur nú í leysum lofti. 

Misálit ávegis

Theresa May segði stutt eftir atkvøðugreiðsluna, at undirhúsið hevur talað, og at stjórnin fer at taka úrslitið til eftirtektar. 

Forsætisráðharrin legði afturat, at stjórnin fer at kunna parlamentið um, hvussu leikur nú fer mánadagin. 

Tað verður hildið, at andstøðuleiðarin, Jeremey Corbyn, fer at taka stig til eitt misálit á stjórnina. Hann skýrdi atkvøðuna eina "vanlukku".