Sudan sett í undantaksstøðu

Hetta er seinasta stigið hjá umstrídda forsetanum í Sudan, har nógvur ófriður hevur verið seinastu vikurnar. Tað skrivar tíðindastovan AFP.

Bashir, sum millum annað hevur verið eftirlýstur av altjóða revsidómstólinum í Haag fyri sín leiklut í fólkadrápinum í Darfur, hevur sitið við valdinum í Sudan síðani hernaðarkvettið í afrikanska landinum í 1989.

Samstundis sum undantaksstøðan varð sett í verk, koyrdi hann alla stjórnina frá, eisini forsætisráðharran, Moussa, og guvernørarnir í øllum teimum 18 landspørtunum.

Nógv mótmælisfólk latið lív

Mótmælisgongur hava verið kring høvuðsstaðin í Sudan síðani 19. desember, og forsetin hevur fleiri ferðir biðið herin um at leggja uppí.

Nógv mótmælisfólk hava latið lív í Sudan. Tíðindastovan AFP skrivar, at mótmælini byrjaðu, tá breyðprísirnir trífaldaðust eftir stuttari tíð.

Mannarættindafelagsskapir siga, at stjórnin í Sudan hevur brotið mannarættindi fleiri ferðir. ST hevur sett tiltøk í verk móti landinum síðani 1995.