Hoyvíkingar hava valt vestmenningar

Nú er greitt, hvørji lið hittast í hálvfinalunum í Okkara-deildini. Onnur hálvfinalan verður millum H71 og VÍF, meðan Neistin og Kyndil skulu spæla hina.

Trý lið endaðu á 25 stigum eftir síðstu dystirnar, og tí avgjørdi innanhýsis málmunurin, at H71 er sterkast.

Hoyvíkingar kundu tí gera av, um teir vilja møta Neistanum, Kyndil ella VÍF.

Sonni Larsen, venjari hjá hoyvíkingum hevur boðað frá, at H71 hevur valt at spæla í móti VÍF í hálvfinaluni.

Tað merkir so, at hin hálvfinalan verður millum Kyndil og Neistan.

Hoyvíkingar hava takið á VÍF

Hálvfinaluliðini hava hitst tríggjar ferðir í landskappingini.

Hoyvíkingar hava vunnið allar dystirnar á VÍF, meðan Neistin og Kyndil hava vunnið hvør sín og spælt ein javnleik.

Dystarskráin kemur seinni, boðar Hondbóltssambandið frá.