- Tíðindi, mentan og ítróttur
KÍ vann evropeiskan stórsigur
Hóast bara fyrri dysturin hjá KÍ er avgreiddur í innleiðandi umfarinum í Evropa League, so kann man næstan við vissu siga, at KÍ hevur spælt seg víðari.
KÍ vann í kvøld heili 5-1 á Tre Fiori, sum kemur úr San Marino, í Gundadali, sum er heimavøllurin hjá KÍ í evropeiskum fótbólti.
Tað sást longu tíðliga í dystinum, at tað var greiður munur á liðunum báðum, og tá farið var til hálvleiks, var KÍ á odda 2-0.
Málini hjá KÍ í fyrra hálvleiki skoraðu Patrik Johannesen og Simen Sandmæl.
KÍ helt á at stýra dystinum, og í seinna hálvleiki økti fyrst Jonn Johannesen til 3-0 og síðani Jóannes Bjartalíð til bæði 4-0 og 5-0.
Tað eydnaðist tó Tre Fiori at koma á máltalvuna í tíðini sum dómarin hevði lagt afturat, tá Andrea Compagno minkaði til 5-1.
Tískil skal ógvuliga nógv til, um KÍ ikki skal koma víðari í Evropa League. Útidysturin ímóti Tre Fiori verður spældur 4.juli.
Kemur KÍ víðari, skulu klaksvíkingar møta Riteriai úr Litava í fylgjandi umfarinum.