Dupultdráp í Marokko: Tríggir menn deyðadømdir

Sambært TV2, er ein fjórði maður dømdur lívlanga fongsulsrevsing, og 20 aðrir eru dømdir millum fimm og 25 ára fongsul fyri leiklut teirra í dupultdrápunum.

Avvarðandi hjá kvinnunum hava eisini fingið tvær milliónir marokkiskar dirham í endurgjaldi. Tað svarar til umleið 1,4 milliónir krónur, skrivar TV2.

Tær báðar 24 og 28 ára gomlu kvinnurnar vórðu funnar dripnar í Atlasfjøllunum í desember í fjør, har tær vóru á ferð í økinum.

Óvist um deyðarevsingin verður framd

Kvinnurnar vórðu dripnar við knívi og síðani skornar á háls. Alt hetta høvdu teir tríggir IS-stuðlarnir tikið á sjónband. Ákæruvaldið kravdi deyðarevsing fyri allar tríggjar menninar. 

Um deyðarevsingin verður framd er tó ivasamt, Marokko hevur ikki framt deyðarevsing síðani 1993. AFP skrivar, at 21 av teimum 24 nú dømdu hava játtað, at teir stuðla IS.

IS hevur ongantíð átikið sær ábyrgdina av drápunum, sum felagsskapurin annars hevur gjørt í øðrum drápum. Sakførarin hjá teimum dømdu hevur boðað frá, at dómurin verður kærdur.