Dómur ikki skotin inn fyri Eystara landsrætt

Dómurin verður ikki skotin inn fyri Eystara landsrætt, siga verjin og ákærin. Maðurin er dømdur eitt árs fongsul.

Maðurin er dømdur fyri at hava neyðtikið eina kvinnu í einum kliva á Norrønu eina februarnátt í 2017. Men hann er frídømdur fyri eina neyðtøku í einari íbúð í Havn í mars í fjør.

Dømdur fyri harðskap

Maðurin er tó dømdur fyri harðskap móti kvinnuni, hann varð ákærdur fyri at hava neyðtikið í íbúðini.

Og hann er dømdur fyri at senda teirri kvinnuni tvær vinarumbønir á Snapchat, hóast hann hevði fingið løgbann, tilhald, fyri at seta seg í samband við hana.

24 ára gamli maðurin er eisini dømdur at rinda kvinnuni, sum hann er dømdur fyri at hava neyðtikið, 42.000 krónur í endurgjaldi fyri tort og sviða og fyri viðgerð hjá sálarfrøðingi.