Viðskiftafólk missa helst pening av húsagangi

Tað skrivar Portalurin, sum endurgevur eina fráboðan frá felagnum. Hvørki heimasíðan ella facebooksíðan hjá felagnum eru longur at finna á netinum.

WeTravel hevur havt skrivstovu í Havn. Sambært fráboðanini, so ávirkar húsgangurin tey viðskiftafólk, sum hava keypt ferð frá felagnum.

Kennir tú onkran, sum er ávirkaður av húsaganginum? Skriva til okkum á news@kvf.fo

Felagið er ikki partur av Rejsegarantifonden. Tí er sannlíkt, at tey, sum hava goldið fyri ferð, tey enn ikki hava verið, missa bæði ferð og pening. 

Sambært fráboðanini, sum er endurgivin á Portalinum, er tað ikki eydnast felagnum at fáa raksturin at bera seg, hóast 1.2 milliónir av nýggjum kapitali eru settar í felagið seinastu tíðina. 

Felagið skrivar:

"Bankin hevur lukkað av, og eru tær 600.000 krónurnar sum komu í allar síðstu løtu, tíanverri ikki nokk at fáa eina positiva ávirkan á WeTravel í framtíðini."

Felagið sigur einki í fráboðanini um, hvussu nógv fólk verða ávirkað av húsaganginum.

Tað vóru teir báðir Jacob Slyne og Niels Juel Nolsøe, ið stovnaðu WeTravel í 2015. Kringvarpið roynir at fáa eina viðmerking frá eigarunum.