Ein leki í nýggjari íbúð á Biskupstorgi í Klaksvík

Jákup Pauli Ziskason, sum leigar eina av nýggju íbúðunum hjá Bústøðum á Biskupstorgi í Klaksvík, skrivaði á Facebook vanga sínum í gjár, at tað lak illa í íbúðini í illveðrinum.

Jákup Pauli Ziskason sigur við Norðlýsið, at tað eisini hevur likið gjøgnum hurðina fyrr, og at hann hevur boðað Bústøðum frá hesum, men einki er gjørt við tað.

Bústaðir og Klaksvíkar kommuna hava samstarvað um byggingina av Biskupstorgi.

Bygningurin fevnir um 30 íbúðir, umframt høli til alment virksemi og annað í veghæddini.

Íbúðirnar eru spildurnýggjar, og leigarar fluttu inn 1. mai í ár, men hóast tað, lekur tað í íbúðini hjá Jákup Paula Ziskason og unnustuni.

Andras Róin, stjóri á Bústøðum, sigur í dag, at hann veit ikki nóg nógv um hetta málið enn, men at serfrøðingar frá Aluplast og byggifelagnum Kanjon fara á staðið í morgin at kanna trupulleikan.