Magn og LÍV gera nýggja vindmyllulund

Magn vann útboðið um vindmyllulundina í Flatnahaga. Nú hava Magn og LÍV stovnað felag, ið skal byggja og reka vindmyllulundina.

LÍV eigur 60 prosent av partapeninginum og Magn 40 prosent. Flatnahagi, har nýggja vindmyllulundin verður, er frámerktur á kortinum niðanfyri.

Sí størri kort

Hendrik Egholm, stjóri í Magn, sigur, at skal grøna orkuskiftið verða veruleiki, er avgerandi, at einkarrætturin hjá SEV at selja streym til vinnulívið og vanliga føroyingin, verður tikin av.

– Kapping um kundan hevur við sær betri prísir og nýskapan, eins og vit hava sæð á telemarknaðinum, sigur Hendrik Egholm í tíðindaskrivi.

Partur av samlaðari íløguætlan hjá LÍV

Jan Jakobsen, stjóri í LÍV, sigur, at tey fegnast um at kunna verða partur av grønu tilgongdini og at geva kundunum eitt nøktandi avkast.

– Henda íløgan er partur av samlaðu íløguætlanini hjá samtakinum, har vit millum annað vilja seta heimsmálini hjá ST á skránna, sigur hann.

Hann sigur, at samstarvið við Magn tryggjar eina góða føroyska verkætlan, við teimum førleikum, sum ein slík ætlan krevur.