Reiðarí keypt seg inn í Gist&Vist

4. mars fekk Gist&Vist, sum millum annað eigur Koks og Hotel Føroyar, nýggjan partaeigara. Tað er partafelagið Christian í Grótinum í Klaksvík, sum fyri 15 milliónir krónur keypti seg inn í felagið, og í dag eigur 9 prosent av partapeninginum. Nýggi eigarin fær eisini møguleika at seta meira í felagið í næstum, so P/f Christian í Grótinum fer at eiga 21 prosent í Gist&Vist.

Gist&Vist eigur umframt Hotel Føroyar og Koks eisini fleiri matstovur ymsastaðir í Havn, millum annað í Gongini í Havn, umframt Hotel Tórshavn, sum er gamla Sjómansheimið. Tað hotellið skal byggjast út til 122 kømur. Hotel Føroyar sjálvt er eisini bygt út frá 129 til 200 kømur.

Farið verður eisini undir at byggja nýtt hotell við nýggja miðbýarøkið í Klaksvík við 80 kømrum. P/f Christian í Grótinum fer at eiga ein fimting av partapeninginum í tí hotellinum, sum Gist&Vist skal reka. Gongur alt sum ætlað við tí hotellætlanini, so letur tað upp í 2023.

Gist&Vist hevði besta úrslit nakrantíð í fjør, við einum yvirskoti eftir skatt upp á 12,9 milliónir krónur