Michelin matstovur á húsagang

Koronakreppan hevur rakt donsku matstovuvinnuna hart, og nú er felagið, sum eigur Michelin-matstovurnar, Kadeau, í Keypmannahavn og á Bornholm, fari á húsagang.

Felagið eigur eisini fleiri aðrar matstovur í Danmark, skrivar Finans.dk.

 - Vit eru noydd at steðga her, sigur fyrisitingarstjórin, Magnus Klein Kofoed.

 - Kreppan hevur rakt okkum hart.

 - Veturin er ikki besta tíðin hjá felagnum, og gjaldførið er í botni, sigur Magnus Klein Kofoed. 

Kadeau-samtakið hevur í fleiri ár havt undirskot upp á fleiri milliónir. Seinasta roknskaparár var undirskotið nærum 10 milliónir eftir skatt.

Starvsfólkini hjá samtakinum eru farin niður í løn, men tað - saman við hjálparpakkunum frá stjórnini - hevur ikki verið nóg mikið.

 - Hetta er eitt lívsverk, sum nú fer fyri skeyti, at tað harmar okkum almikið, sigur fyrisitingarstjórin.

Matstovan hjá Kadeau í Keypmannahavn hevur tvær michelin-stjørnur, og tann á Bornholm hevur eina.