Fiskur fyri 150 milliónir á goymslu

Pelagos í Fuglafirði hevur fisk fyri umleið 150 milliónir krónur á goymslu í løtuni, tí størsti marknaðurin, tann russiski, liggur stillur í løtuni, skrivar Vinnuhúsið.

– Vit liggja inni við goymslum, sum seljast seinni, enn tær plaga, sigur Jóhan Páll Joensen, stjóri, sambært heimasíðuni hjá Vinnuhúsinum.

Vanliga verður selt av goymslunum út á marknaðirnar kring heimin frá februar til august, men í ár er ringt at sleppa av við fiskin. Smittutálmandi tiltøkini í Russlandi gera, at eftirspurningurin av vørunum frá Pelagos er minkaður munandi. 

Fraktkostnaðurin í Fjareystri tvífaldaður

– Tað gongur striltið at selja til Russlands í løtuni, sigur stjórin í Pelagos í Fuglafirði.

Men eisini marknaðirnir í Afrika og Fjareystri eru meir ella minni steðgaðir upp, meðan fraktkostnaðurin í Fjareystri er tvífaldaður. 

Jóhan Páll Joensen hevur kortini góðar vónir um at sleppa av við fiskin á goymsluni seinni í ár, tí vørurnar verða framleiddar til handlar í Russlandi og eru í tí bíliga endanum.  

Pelagos framleiðir uppsjóvarfisk til matna, serliga makrel og sild. Meginparturin av fiskinum á goymslu er makrelur, skrivar Vinnuhúsið á heimasíðuni.