- Tíðindi, mentan og ítróttur
Klæmint eisini í NSÍ næstu tvey árini
Málkongurin í føroyskum fótbólti, Klæmint Andrasson Olsen, fer eisini at spæla við NSÍ næstu tvey ár.
Tað skrivar NSÍ á heimasíðuni.
Klæmint Andrasson Olsen longdi í gjárkvøldið sáttmálan við NSÍ við tveimum árum.
Hetta kemur væl við hjá NSÍ, sum júst hevur mist Petur Knudsen, sum hevur skrivað sáttmála við Lyngby í næstbestu donsku deildini.
Málmaskina
Klæmint Andrasson Olsen, sum bara hevur umboðað NSÍ, eigur málmetið í Føroyum. Tað er rímiligt at siga, at hann er ein málmaskina.
Sambært heimasíðuni faroesoccer.com, hevur Klæmint Andrasson Olsen skotið 211 mál í 336 dystum í bestu fótbóltsdeildini.
Harumframt hevur hann skotið 22 mál í 30 steypadystum.
Og so hevur Klæmint A. Olsen skorað sjey mál fyri A-landsliðið.