Sand verður fyrsti tvørkyndi hondbóltsspælarin í svenskum hondbólti

Í Svøríki verður Loui Sand fyrsti tvørkyndi hondbóltsspælarin í bestu svensku hondbóltsdeildini hjá monnum.

Loui Sand hevur fyrr spælt á svenska kvinnulandsliðnum, men gavst fyri tveimum árum síðan, tá hann fór undir kynsskifti.

- Eg var føddur í skeivum kroppi, segði Loui Sand tá.

Seinastu mánaðirnar hevur hann vant við Karra HF, sum spælur í bestu svensku mansdeildini.

Og Sand hevur nú skrivað undir sáttmála, sum samstundis hevur við sær, at hann verður fyrsti tvørkyndi hondbóltsspælarin í svenskum manshondbólti.

Loui Sand, ella Louise Sand, sum hon æt tá, fór undir sína yrkisleið í júst Kärra HF fyri 17 árum síðan.

- Hetta er dømi um, at ítrótturin kann rúma tvørkyndum, sigur Loui Sand við svenska Aftenposten.

Loui Sand spældi 105 dystir á svenska kvinnulandsliðnum og skeyt 221 mál.

28 ára gamli Loui Sand kann spæla sín fyrsta dyst mikudagin, tá ið Karra HF spælur ímóti Lugi HF í svensku steypakappingini.

Týsdagin skulu IK Säverhof, sum hevur Elias Ellefsen á Skipagøtu í hópinum, spæla ímóti Torslanda, eisini í steypakappingini. Føroyingurin verður ikki við, tí hann skal spæla við føroyska U19-landsliðnum í EHF Championship kappingini í Varna í Bulgaria.

Loui Sand