Fíggjarmálaráðið: Misskiljingar gjørdu, at umsóknin kom ov seint

Fíggjarmálaráðið heldur, at byggifelagið J&K Petersen kunnaði seg ikki nóg væl um nýggju tíðarfreistirnar fyri undangóðkenningini at bjóða upp á arbeiðið at gera berghol til Fámjins, og tí hevur fyritøkan latið umsóknina ov seint inn.

Jørgen Niclasen

Hinvegin hevur nýggja freistin, sum Landsverk ásetti, elvt til misskiljingar, og tað hevur víst seg at vera ein beinleiðis orsøk til, at J&K Petersen læt umsóknina ov seint inn.

Tað sigur Jørgen Niclasen, landsstýrismaður, í svari til Høgna Hoydal, løgtingsmann, sum hevur spurt um málið.

J&K kærdi

J&K Petersen kærdi málið til Fíggjarmálaráðið, og ráðið hevur viðgjørt kæruna sambært vanligum fyrisitingarligum mannagongdum. Í hesum sambandi er Landsverk, sum partur av kæruviðgerðini, hoyrt, og Landsverk hevur ikki mælt til at úseta málið. 

Fíggjarmálaráðið heldur, at talan er um eina tíðarfreist, sum ikki er lógarásett, tí málið snýr seg um eina undangóðkenning, ið ikki er fevnd av lógini um útbjóðing.

LV nærmast at bera váðan

Jørgen Niclasen sigur, at niðurstøðan hjá Fíggjarmálaráðnum er, at Landsverk er nærmast at bera váðan fyri støðuna, sum er íkomin.

Avgerðin hjá Landsverki er ógildað, og Fíggjarmálaráðið hevur heitt á Landsverk um at áseta nýggja tíðarfreist, har Landsverk heitir á fyritøkur um at verða góðkendar av nýggjum í sambandi við Fámjinstunnilin. 

Høgni Hoydal, Jenis av Rana, løgtingið, løgtingsarbeiði