Pauli tók pippið frá kekkum

Um onkur ikki hevur fingið tað við, so eiga Føroyar nakrar sera dugnaligar ungar hondbóltsspælarar, og kanska teir dugnaligastu spæla á U19-manslandsliðnum. 

Í dag spældi Føroyar bólkafinaluna móti Kekkia í EHF Championship-kappingini, sum verður spæld í Bulgaria. 

Føroyar vunnu sera sannførandi 31-28 sigur eftir at tað stóð á jøvnum 15-15 í hálvleikinum

Pauli plankeværk

Sum ikki einaferð, so var tað stórtalentið Elias Ellefsen á Skipagøtu, ið gekk á odda við 13 málum.

Men besti spælarin hjá Føroyum í dag var Pauli Jacobsen í málinum. 

Danir brúka ofta orðið "plankeværk", ella trægriðing, um góðar málverjar, og tað er ikki ov nógv sagt, at Pauli í dag var eitt plankeværk. 

Ferð eftir ferð bjargaði Pauli Jacobsen, tá kekkar høvdu opnar málmøguleikar, og tók hann fullkomiliga pippið frá kekkisku leikarunum í seinna hálvleiki. 

Við sigrinum hevur føroyska U19-manslandsliðið spælt seg í hálvfinaluna í EHF Championship-kappingini, sum verður spæld leygardagin, og har verður mótstøðuliðið Slovakia. 

Væl nøgdur venjari

Julian Johansen, venjari, var væl nøgdur við dystin, men hann var ikki í iva um, at føroyska liðið hevði Paula Jacobsen, málverja, fyri at takka, at teir vunnu dystin, og skulu spæla hálvfinalu móti Slovakia og ikki Hvítarusslandi leygardagin. 

Hoyr samrøðuna við Julian Johansen, sum væntar sær ein harðan dyst móti Slovakia:

Julian Johansen

Frítekst tagging: 

Julian Johansen

KEKKIA - FØROYAR 28-31 (15-15)

Føroyar

Málverjar:
12 Alexandar Lacok 0 mál
16 Pauli Jacobsen 0 mál
-------
Útileikarar:
40 Bogi Hansen 2 mál
60 Baldur Gillason 1 mál 
61 Janus Dam Djurhuus 4 mál
63 Pauli Mittún 5 mál 
65 Bjarni í Selvindi 0 mál
67 Elias Ellefsen á Skipagøtu 13 mál
78 Óli Mittún 3 mál 
79 Rói Ellefsen á Skipagøtu 0 mál
80 Pauli Høj 0 mál 
81 Viktor Gaini 3 mál 
82 Ragnar Karlsson 0 mál 
83 Sakir Tróndarson Frýdal 0 mál
93 Sveinur Olafsson 0 mál
94 Hákun West av Teigum 0 mál