Tríggir Premier League-dystir útsettir

Annar jóladagur - ella Boxing Day, sum bretar nevna hann - er siðbundin fótbóltsdagur í Englandi, og eins og undanfarin ár er nógvur fótbóltur á skránni.

Men í ár órógvar korona eitt sindur.

Í Premier League skuldu níggju dystir spælast í dag, men tríggir av teimum eru útsettir, tí fleiri feløg hava koronu í hópinum.

Dystirnir millum Liverpool og Leeds, Wolves og Watford og Burnley og Everton eru allir útsettir.

Næstbesta enska deildin er enn harðari rakt. Har eru heili sjey av 10 dystum, sum skuldu spælast í dag, útsettir.

Ensku fótbóltskappingarnar hava sum heild verið spældar sum ætla, síðan koronufarsóttin byrjaði, men eftir at omikronfrábrigdið er komið, hevur gingið alsamt verri at hildið dystarætlanirnar.

Enn er kortini ikki ætlanin at steðga kappingunum.

Premier League í dag:

15:00 Manchester City-Leicester City
15:00 Norwich City-Arsenal
15:00 Tottenham Hotspur-Crystal Palace
15:00 West Ham-Southampton
17:30 Aston Villa-Chelsea
20:00 Brighton & Hove Albion-Brentford