Jóannes Poulsen skeyt seg til áttanda pláss í Nimes

Jóannes Poulsen varð nummar átta av 110 compound-skjúttum, tá sterk bogaskjótikapping var í Nimes í Fraklandi um vikuskiftið.

Føroyski skjúttin rakk fjórðingsfinaluni, har Roberto Carosati gjørdist ov sterkur. 

 - Eg var væl nøgdur við úrslitið, serliga tá nógvir heimsmeistarar og elituskjúttar vórðu úti áðrenn eg, sigur Jóannes Poulsen.

 - Men skjótingin hjá mær kundi verið millum tvey til fýra stig betur.

Hetta var fyrsta stóra kappingin hjá Jóannesi Poulsen í ár.

 - Hetta hevur eisini samband við royndir, nervar og trúgv upp á tað, og tað tekur sína tíð til eg verði nøgdur við tann partin, sigur Jóannes Poulsen. 

Jóannes Poulsen fekk fyri kortum 100.000 krónur í úrvalsstuðuli frá ÍSF, og ætlanin er, at nýta peningin til at taka lut í fleiri kappingum uttanlands.

Næsta kappingin, sum er á skránni, er EM í innandura skjóting í Slovenia. Hon er frá 14. til 19. februar.