Jenis av Rana fingið svar frá Uttanlandsnevndini um radaran

Uttanlandsnevndin hjá Løgtinginum gav fyrrapartin Jenisi av Rana, landsstýrismanni í uttanríkismálum, svar viðvíkjandi radaramálinum.

Tað váttar Bill Justinussen, formaður í Uttanlandsnevndini.

Hósdagin var fundur í uttanlandsnevndini hjá Løgtinginum, og eftir tann fundin hevur nevndin orðað svarið, sum landsstýrismaðurin fær eftir ráðførslu við uttanlandsnevndina.

Í trúnaði

Bill Justinussen leggur dent á, at svarið er í trúnaði, og tí kann hann ikki siga nakað um innihaldið í svarinum, heldur ikki hvussu nógv svar uttanlandsnevndin er komin við.

Tíðindaportalurin in.fo skrivar, at landsstýrismaðurin hevur fingið trý svar, eitt frá samgonguni, eitt frá Javnaðarflokkinum og eitt frá Tjóðveldi. 

Bill Justinussen vil hvørki vátta ella avsanna hetta fyri útvarpinum.

Hann vísir bara á, at hann hevur tagnarskyldu í málinum.