Eingir hondbóltsdystir spælast í Ukraina næstu fýra vikurnar

Stríðið millum Russland og Ukraina hevur nú við sær, at eingir EHF-dystir verða spældir í Ukraina næstu fýra vikurnar. Sostatt skal H71 ikki til Lviv at spæla fjórðingsfinalu

H71 skal neyvan til Ukraina at spæla ímóti HC Galychanka

Símun Christian Olsen

22.02.2022 - 14:13

Eingir hondbóltsdystir, sum evropeiska hondbóltssamgongan, EHF, varðar av, verða spældir í Ukraina komandi fýra vikurnar.

Tað boðar evropeiska hondbóltssamgongan frá, eftir at Russland hevur sent herdeildir inn í eystara part av Ukraina.

Dystirnir skulu spælast á uttanveltaðum stað.

Sostatt skal H71 neyvan til Lviv at spæla fjórðingsfinalu ímóti ukrainska liðnum, HC Galychanka, sum vann við einum málið í Havn um vikuskiftið.

Í tíðindaskrivinum frá EHF verður fyrra fjórðingsfinalan millum hoyvíkingar og HC Galychanka nevnd. Dysturin skuldi spælast í Lviv 13. februar, men H71 møtti ikki til dystin, eftir at danska uttanríkisráðið heitti á danskar ríkisborgarar um ikki at fara til Ukraina.

EHF sigur, at eingin avgerð er tikin um dystin enn, men at málið framvegis verður viðgjørt.

Í Champions League skuldi Paris Saint-Germain spæla ímóti HC Motor í Ukraina 17. februar. Eftir ætlan skuldi ukrainska liðið eisini spæla á heimavølli ímóti Barcelona 3. mars.

EHF hevur avgjørt, at hesir báðir dystirnir skulu spælast á uttanveltaðum vølli.