KÍ og EBS/Skála oddalið í bestu deildini við kvinnum

KÍ vann sær trý góð stig í dysti ímóti Víkingi í Sarpugerði í dag. 

Klaksvíksingar høvdu nógva vindin undan fyri steðgin og løgdu seg á odda 2-0.

Ein hálvur tími var spældur, tá Hervør Olsen legði KÍ framum, og tíggju minuttir seinni økti Tórun Højgaard Joensen um leiðsluna.

Eftir steðgin var tað Víkingur, sum var omaná. Bert fimm minuttir vóru farnir, tá Hanna Isaksen Højgaard minkaði um munin.

Heimaliðið hevði nakrar møguleikar at javna, men sum so mangan, fór KÍ avstað við øllum. Sjey minuttir vóru eftir at spæla, tá útiliðið økti til 3-1 eftir sjálvmál.

EBS/Skála vann á HB

EBS/Skála tók ímóti HB í Hólmanum á Eiði. Bæði liðini vunnu í fyrsta umfari, men í dag sendi heimaliðið HB aftur til Havnar við ongum.

Silja Augustinussen og Kára Djurhuus skutu málini fyri EBS/Skála í seinna hálvleiki. Ása á Reynatúgvu hjá HB varð send av vølli seint í dystinum.

Í Runavík vann NSÍ sannan stórsigur ímóti nýggja liðnum í deildini, TB/FCS/Royn. Heidi Sevdal skeyt ikki færri enn fýra mál í 11-0 sigrinum.

Í gjár vann 07 Vestur 5-0 á B36 á Dungasandi. Sissal Haraldsen skeyt hattrikk, og Evelin Da Silva Mastropasqua og Carol Assis Silva skoraðu hini málini fyri vágaliðið.

KÍ og EBS/Skála eru fremst við seks stigum, meðan Víkingur, NSÍ, 07 Vestur og HB øll hava trý stig. B36 og TB/FCS/Royn hava onki stig fingið enn. Tvey umfør eru spæld.