Fyrsta FM-finalan hjá monnunum seinnapartin

H71 tekur ímóti KÍF í fyrstu finaluni um føroyameistaraheitið í hondbólti hjá monnum seinnapartin.

Spælt verður 'best av fimm' so minst tríggir dystir skulu til fyri at avgera kappingina  um FM-heitið.

H71 hevði lætt spæl í hálvfinalunum, har hoyvíkingar longu seinasta vikuskifti tryggjaðu sær finaluplássið eftir tveir stórsigrar á Team Klaksvík.

Hinvegin máttu kollfirðingar stríðast í trimum dystum ímóti VÍF, áðrenn plássið í finaluni varð tryggjað hóskvøldið.

FM-finalan í dag byrjar klokkan 16.00.

Team Klaksvík skrivaði søgu

Team Klaksvík reisti seg eftir laga avrikið í hálvfinalunum, tá klaksvíkingar vunnu bronsuheiðursmerki fyri fyrstu ferð. 

Hetta hendi eftir sera javnan dyst ímóti VÍF, sum mátti avgerast við brotskøstum. Úrslitið var 35-34.