Føroyar enn ikki tikið støðu til ES-bann av russiskum skipum

Leygadagin, páskaaftan, kemur bannið í gildið, sum steðgar russiskum skipum í at koma inn í havnir í ES londum.

Bannið kemur sum partur av 5. pakkanum við revsitiltøkum.

Undantøk eru tó, eitt nú fyri skip, sum eitt nú flyta olju og gass, matvørður og neyðsynjarvørður.

Jenis av Rana

Ikki tikið støðu

Føroyar hava ikki bannað russiskum skipum at koma í føroyskar havnir, og tað verður heldur ikki gjørt enn.

Jenis av Rana, landsstýrismaður í uttanríkismálum sigur í stuttari viðmerking, at landsstýrið ikki hevur tikið støðu til hvat tey gera enn, og hava biðið um eina útgreining av banninum og undantøkunum, fyri at nágreina júst hvønn bólk fiskiskip fella undir, tí í løtuni tykist tað at vera ein tulkingarspurningur.

Tí verður helst ikki greitt hvussu verður við bannið móti russiskum skipum í føroyskum havnum fyrr enn eftir páskir, sigur Jenis av Rana, landsstýrismaður í uttanríkismálum.