Virki í Føroyum kunnu fáa danskt skrásetingartal

Løgmansskrivstovan hevur biðið Digitaliseringsstyrelsen í Danmark um at gera eitt uppskot um lógarbroyting ella fyrisitingarligar skipanir, so fyritøkur og virki í Føroyum kunnu fáa danskt CVR-tal.

CVR er stytting fyri Det Centrale Virksomhedsregister.

Nakað tað sama sum í føroyum er V-tal.

Føroyingar kunnu fáa danskt CPR-tal og Nem-Id, so teir kunnu brúka telduskipanina í Danmark.

Nú Nem-Id skipanin verður umløgd til Mit-Id og Nem-Login, verða tillagingar gjørdar í skipanini í Føroyum. 

Vinnuhúsið og Advokatfelagið eru fyri

Í sambandi við hesar tillagingar hava danskir myndugleikar spurt, um føroyingar vilja, at føroysk virki kunnu útvega sær danskt CVR-tal og Mit-Id og Nem-Login at nýta til telduskipanir í Danmark, har hetta er eitt krav.

Vinnuhúsið og Advokatfelagið hava svarað, at tey vilja hava slíka skipan.

Løgmansskrivstovan hevur tí heitt á Digitaliseringsstyrelsen um at koma við uppskoti um hana.