Elias Ellefsen á Skipagøtu skal til týska stórliðið Kiel

Eftir hetta kappingarárið skiftir føroyska stórtalentið í hondbólti, Elias Ellefsen á Skipagøtu, svenska Sävehof út við týska stórfelagið Kiel, sum er eitt av heimsins sterkastu hondbóltsfeløgum.

Tað skrivar svenska blaðið, Aftonbladet, ið plagar at hava serstakliga vælvitandi keldur, tá ið tað snýr seg um hondbólt.

20 ára gamli hoyvíkingurin hevur veruliga gjørt vart við seg í svensku kappingini, har hann í meira enn eitt kappingarár hevur verið størsta stjørnan.

Elias Ellefsen á Skipagøtu

Sertreyt í sáttmálanum

Í fýra ára sáttmála sínum við Sävehof hevur Elias Ellefsen á Skipagøtu ta treyt, at um okkurt av evropisku stórfeløgunum - og tey eru nevnd við navni í sáttmálanum - vísir áhuga, skal Elias kunna verða loystur úr svenska sáttmálanum ímóti einum ávísum gjaldi.

Eftir øllum at døma, so ætlar Kiel, at Elias Ellefsen á Skipagøtu fylla plássið út fyri norska landsliðsspælararn, Sandor Sagosen, ið ætlar sær heimaftur til norskan hondbólt.

Sävehof vil, sambært Göteborgs-Posten, ikki vátta tíðindini um, at Elias Ellefsen á Skipagøtu skiftir til Kiel.